Parku Kombëtar Divjakë-Karavasta ka sot një nga administratat më të mira dhe më profesionale në rang vendi, kjo falë një pune dhe përkushtimi në shumë vite të njerëzve që punojnë aty dhe që i përkasin asaj zone.
Por në vitet e fundit, aty nga ana e qeverisë, deputetëve të zonës dhe ministrisë së Turizmit dhe Mbrojtjes së Mjedisit, shpesh janë “futur hundët” për të bërë gjoja “investime të qëndrueshme” por që në fakt kanë pasur për qëllim përfitimet dhe prishjen e ambientit të parkut natyror, i vetmi për nga lloji në Shqipëri.
Po ashtu në Divjakë janë kthyer sërish ministri i Turizmit, Blendi Klosi dhe drejtori i tij, Zamir Dedej, po jo për të bërë investimin e radhës, por për të promovuar ca miliona të investuara nga qeveria japoneze, por që në fakt janë prej punës së vet administratës së parkut.
“JICA” një agjenci japoneze, ka dhënë një financim për përmirësimin e menaxhimit të ekosistemeve në Parkun Kombëtar Divjakë-Karavasta
Agjencia Japoneze për Bashkëpunim Ndërkombëtar (JICA) dhe Qeveria shqiptare nënshkruan dje pikërisht në ambientet e parkut, marrëveshjen e bashkëpunimit për menaxhimin e ekosistemeve në Parkun Kombëtar Divjakë-Karavasta.
Klosi premton sërish
Objektivi kryesor i Projektit është rritja e mbrojtjes së natyrës dhe biodiversitetit në Zonat e Mbrojtura të Shqipërisë, por që deri tani këto zona vetëm janë shkatërruar ose janë lënë në mëshirë të fatit.
Projekti synon të rrisë kapacitetin menaxherial i burimeve njerëzore të Agjencisë Rajonale të Zonës së Mbrojtur të Qarkut Fier (ARZM Fier).
Pas nënshkrimit të marrëveshjes, ministri Klosi u shpreh se, “një nga objektivat kryesore të Qeverisjes, në Strategjinë Kombëtare për Zhvillim dhe Integrim 2015-2020, është rritje ekonomike e qëndrueshme, që bazohet edhe në investime e aktivitete miqësore me mjedisin dhe kontribuon ne ruajtjen dhe zhvillimin e tij”.
Sipas Klosit, “me asistencën e JICA-s, ne kemi hartuar një plan menaxhimi specifik për Parkun Kombëtar të Divjakë-Karavastasë, i cili në përmbajtje adreson gjithë mundësitë dhe sfidat e sotme për zhvillim ekonomik duke mbrojtur mjedisin”.
Ministri shprehu bindjen se qeveria japoneze do të vazhdojë të kontribuojë në ruajtjen e natyrës e biodiversitetit dhe zhvillimin e qëndrueshëm në Shqipëri.
Nga ana e tij, ambasadori i Japonisë në Tiranë, Ito tha se, “Ky projekt është më i ri në vargun e Projekteve të Zhvillimit që Japonia ka zbatuar në Shqipëri në sektorë të ndryshëm si infrastruktura, bujqësia, shëndetësia, zhvillimi dhe planifikimi hapësinor etj”.
Përveç projekteve me JICA, Japonia ka financuar shumë projekte në shkallë të vogël në fushën e mjedisit, përmes Ambasadës së Japonisë në Tiranë.
Qëllimi i projektit
Projekti i financuar nga qeveria japoneze, është të krijojë një model për harmonizimin e ruajtjes me përdorimin e qëndrueshëm të zonave të mbrojtura në këtë Park, përmes zbatimit të aktiviteteve mes planeve të veprimit me palët e interesit.
Si i tillë, Projekti pritet të promovojë një qasje të menaxhimit të bazuar në ekosistem dhe forcimin e funksionit të Komitetit të Menaxhimit të Parkut Kombëtar. Më tej, ky model pritet të shpërndahet me zonat e tjera të mbrojtura në Shqipëri për forcimin e kapacitetit menaxhues në të gjithë vendin.
Projekti ka një vlerë prej 1.62 milionë euro dhe do të zgjasë për 3 vjet.
Përmes këtij projekti të bashkëpunimit teknik, ekspertët japonezë të JICA do të dërgohen në Shqipëri, për të ndihmuar AKZM dhe ARZM Fier, të zbatojnë një qasje për menaxhimin e parkut, të bazuar në ekosistem, që njeh ndërveprimet midis përbërësve të ekosistemit, përfshirë speciet, habitatet, shërbimet e ekosistemit dhe njerëzit, si dhe promovimin e mënyrës së integruar të punës në sektorë, duke përfshirë ruajtjen, peshkimin, bujqësinë dhe turizmin, në mënyrë që të sigurohet pajtueshmëria e ruajtjes dhe përdorimi i qëndrueshëm i biodiversitetit dhe shërbimeve të ekosistemit në Parkun Kombëtar të Divjakë-Karavastasë.
Trajnimet në Japoni ose vende të tjera, në lidhje me zbatimin e një qasjeje të menaxhimit të bazuar në eko-sistem, janë planifikuar gjithashtu të ndërmerren përmes mbështetjes së JICA, për personelin e NAPA dhe RAPA Fier, me qëllim rritjen e kapacitetit të burimeve njerëzore. Një numër pajisjesh do t’i sigurohen organizatës homologe përmes këtij bashkëpunimi teknik.
Deri më tani në Republikën e Shqipërisë, JICA, ka zhvilluar projekte të ndryshme në fushat e mjedisit, zhvillimit të sektorit privat, shëndetit dhe promovimit të turizmit.
Zyra e Ballkanit e JICA mbulon 6 shtete në Ballkan, Shqipëri, Bosnjë dhe Hercegovinë, Kosovë, Maqedoni e Veriut, Mal të Zi dhe Serbi.
/GazetaReforma.com/
