Finalja e madhe ‘Conference League’ mes Romës dhe Feyenoord-it ka sjellur në Shqipëri mijëra tifozë nga Italia dhe Holanda. Nisur nga veprimet e dhunshme nga tifozët mbrëmjen e djeshme, tashmë janë marrë masa të veçanta.
Garda e Republikës do të marrë nën mbrojtje të gjitha institucionet e rëndësisë së veçantë, për t’iu parapritë çdo situate sa i takon mbajtjes sot të finales së Konferencë Ligës.
Garda do të pozicionohet në të gjitha institucionet kryesore që ndodhen në Bulevardin ‘Dëshmorët e Kombit’.
Kujtojmë që pas përplasjeve të dhunshme të tifozëve me njëri-tjetrin por dhe me efektivët e policisë mbrëmjen e djeshme në Tiranë, Zv/drejtori i Përgjithshëm i Policisë së Shtetit deklaratë për mediat:
“Policia e Shtetit informon opinionin publik se gjatë mbrëmjes së datës 24 maj 2022, në disa zona të kryeqytetit, ka patur cenime të rendit publik midis grupeve të tifozëve që kanë ardhur për të mbështetur ekipet e tyre në Finalen e UEFA Conference League, midis ekipeve të Romës dhe Feyenoordit. Sikurse kemi bërë me dije vazhdimisht këto ditë, në disa dalje publike të drejtuesve të Policisë së Shtetit, përsa i përket sigurisë, Policia ka marrë masa të plota jo vetëm për mbarëvajtjen e kësaj ndeshjeje, por edhe për të gjitha aktivitetet që do të zhvillohen në vendin tonë, duke filluar nga Pikat e Kalimit Kufitar, në rrugëkalimet e ekipeve, të sportdashësve të tyre apo edhe për garantimin e rendit publik për qytetarët e tjerë në Tiranë, të cilët nuk kanë lidhje me këtë aktivitet sportiv etj., si dhe për garantimin e rendit e sigurisë në të gjithë territorin e Republikës së Shqipërisë”.
