Në ambientet e Kinemasë “Republika” në Shkodër ka nisur edicioni i 8-të i festivalit ndërkombëtar “Ekrani i Artit”, një ngjarje kulturore që këtë vit sjell temën intriguese “Kartolina nga tjetërkund”.
Për pesë ditë me radhë, qyteti do të shndërrohet në një qendër të artit bashkëkohor vizual, ku do të prezantohen 111 projekte artistike, përfshirë 40 premiera shqiptare dhe tre ekspozita të shpërndara në hapësira të ndryshme të qytetit.
Ndryshe nga shumë festivale të tjerë, “Ekrani i Artit” vijon të ruajë natyrën e tij eksperimentale dhe reflektuese, pa dhënë çmime, por duke krijuar një hapësirë të hapur për dialog, ide dhe ndërveprim mes artistëve dhe publikut.
Festivali u çel me filmin “Arsa” nga kolektivi artistik MASBEDO, i realizuar nga regjisori italian Iacopo Bedogni, i cili ishte i pranishëm në ceremoninë e hapjes. Në një deklaratë për mediat, ai tha: “Është hera e dytë që marr pjesë në këtë festival të jashtëzakonshëm. Filmi ‘Arsa’ është shfaqur në kinematë italiane në prill, dhe është një emocion i madh për mua ta sjell këtu, në këtë atmosferë kaq mikpritëse.”
“Ekrani i Artit” do të vazhdojë deri më 22 qershor, duke ofruar një program të larmishëm dhe pjesëmarrjen e shumë artistëve nga Shqipëria dhe vende të tjera, në një rrugëtim që bashkon kinemanë, artin bashkëkohor dhe reflektimin shoqëror në zemër të Shkodrës.
