Në fshatin Pojan të Fierit, një nga 100 fshatrat më të bukur të Shqipërisë, dhe vetëm pak hapa larg Parkut Arkeologjik të Apolonisë, u mbajt “Festa e Grurit”, një ngjarje që tashmë është kthyer në traditë dhe që përkon me kulmin e sezonit bujqësor në Myzeqe, korrjen dhe shirjen e grurit.
Atmosfera festive nisi me një paradë të nxënësve të shkollave vendase, të veshur me kostume tradicionale, duke i dhënë aktivitetit ngjyrat e trashëgimisë kulturore.
Më pas, fermerët parakaluan me autokombajna dhe makineri bujqësore, simbol i përparimit teknologjik dhe rëndësisë së bujqësisë për ekonominë lokale.
Në qendër të festës ishte panairi i bukës dhe prodhimeve të zonës, ku vizitorët shijuan specialitete tradicionale dhe produkte bio, duke njohur më nga afër pasurinë kulinare të Myzeqesë.
Programi artistik u pasurua nga këngë dhe valle popullore, interpretuar nga Ansambli “Myzeqeja Fierake”.
Kjo festë me rrënjë që i shkojnë deri në antikitet, u organizua për herë të parë nga Bashkia Fier në vitin 2019 dhe këtë vit mblodhi rreth 3000 pjesëmarrës, përfshirë banorë të zonës, vizitorë nga qytete të tjera të Shqipërisë dhe emigrantë të kthyer për pushime.
