Drejtori i FBI-së, Kash Patel, ka njoftuar nisjen e një hetimi mbi një valë të fundit të dhunës të drejtuar ndaj kompanisë Tesla.
“Gjatë ditëve të fundit, kemi ndërmarrë masa shtesë për të trajtuar këto incidente. Ky është terrorizëm i brendshëm dhe ata që qëndrojnë pas këtyre akteve do të kapen e do të përballen me drejtësinë,” deklaroi Patel për Reuters.
Presidenti amerikan, Donald Trump, ka dënuar ashpër një nga incidentet e fundit, ku një person i paidentifikuar vendosi flakën disa automjeteve Tesla në një parking të shitjeve të kompanisë në Las Vegas, duke përdorur kokteje molotov dhe duke hapur zjarr ndaj makinave.
“Ata që qëndrojnë pas kësaj kanë një shans shumë të madh për të përfunduar në burg për 20 vjet,” u shpreh Trump.
Tesla, e drejtuar nga miliarderi Elon Musk, është bërë objektiv protestash në disa qytete amerikane.
Kjo valë sulmesh vjen në një kohë kur Musk, në rolin e tij si drejtues i Departamentit të Efikasitetit të Qeverisë (DOGE), po zbaton masa të rrepta kursimi në administratën federale, duke shkurtuar mijëra vende pune dhe duke anuluar qindra kontrata ndihme të financuara nga qeveria.
