Është zhvilluar sot seanca gjyqësore ndaj ish-ministrit të Mbrojtjes, Fatmir Mediu për tragjedinë e Gërdecit, pas shtyrjes që ndodhi një javë më parë nga vetë Mediu.
Pas përfundimit të seancës në GJKKO ka folur Mediu për mediat, i cili tha se do të paraqitet në çdo seancë sa herë që të thirret.
Ai deklaroi edhe njëherë se nuk ka shkelur në asnjë moment detyrën e tij dhe as nuk ka bërë shkelje. Mediu tha se në maj kishte raportuar ndërhyrje të paligjshme nga kompania, për ndërtim pa leje, gjë që sipas tij e kishte raportuar te Policia Ushtarake. Sipas tij kjo strukturë duhej të vepronte.
“Dua të dalë e vërteta rreth këtij procesi. U provua se Fatmir Mediu ka vepruar në respekt të ligjit të detyrimeve të NATO e BE. Po ashtu ka patur marrëdhënie korrekte me të gjithë strukturat. Nuk ka patur asnjë reklamim te ministri i mbrojtjes për gërdecin. Sot vura në dijeni një dokument të policisë ushatarake. Qëndrimi im ka qenë i prerë duhej të procedoheshin penalisht të gjithë ata që kanë shkelur ligjin.
Unë do të jem në çdo seancë që do të trajtohet çështja e Gërdecit. Do të jem prezent siç isha edhe sot. Ka një raport mujor të policisë ushtarake që i drejtohet edhe shefit të shtabit edhe policisë “, tha Mediu ndër të tjera.
