Nuk ka ende asnjë rezultat nga kërkimet për gjetjen e Arjan Salës, i cili u fut në magazinën në flakë të “Casa Italias” që prej ditës së mërkurë. Familjarët vazhdojnë të presin të dëshpëruar jashtë ndërtesës, ndërsa njëri prej tyre u fut brenda me zjarrfikësit për të ndihmuar në kërkime e nuk ka pranuar të dalë pa e gjetur. E ndërkohë që familjarët vazhdojnë pritje, poltika është në kulmin e fushatës elektorale pa u kujtuar për ngjarjen e rëndë dhe për fatin e të riut. Xhaxhai i Salës ka bërë thirrje që kryeministri e presidenti t’i kushtojnë pak kohë e të mblidhen e për një hero që shpëtoi jetë njerëzish. Ai kërkon që familjari i vetë të mos shkojë i humbur, por të kenë mundësi ta qajnë.
“Nesër e mbrapa nëse thirrja ime nuk dëgjohet nga askush, nuk besoj se policia do na kundërshtojë, por do të heqë uniformën dhe do të futet bashkë me ne që të kërkojmë kockat e djalit. Zjarrfikësit nuk është se nuk janë profesionistë, por i kanë shkrirë mundësitë e tyre. Ju lutem zoti kryeministër, zoti President na kushtoni pak kohë, mblidhuni për një hero që shpetoi jetë njerëzish. Të mos shkojë i humbur, të kemi ku ta qajmë me diçka të vogël. Kërkoni ndihmë nga shtetet fqinje, nga ato që kanë ndihmuar edhe në tragjeditë e mëparshme,”- ka thënë xhaxhai i 33-vjeçarit.
