Pasi morën vesh lajmin se Jan Prenga është rrëmbyer, familjarët e tij nuk e kontaktuan policinë, por bënë përpjekje privatisht për të liruar të afërmin e tyre.
Ata mësohet se kanë kontaktuar edhe pajtues gjaqesh, të cilët hynë në negociata për të liruar pengun.
Më herët se policia të zbardhte skemën se kush fshihej pas rrëmbimit, familjarët e Jan Prengës nuk kishin dhënë asnjë informacion në polici.
Ndërkohë, përgjimet me vëllain e Jan Prengës nga burgu në Angli zbardhën porosinë e tij për familjen.
“Mos tregoni asgjë në polici! Jani është mirë, po mbahet peng në Shijak”, u tha ai familjarëve.
Trupi i 49-vjeçarit nuk është gjetur ende, megjithatë familja e tij ka hapur dyert e mortit, ndërkohë që i bëjnë apel shtetit ta gjejë trupin sa më parë dhe ta sjellë pranë familjes.
Edhe pse ende nuk është zbardhur e plotë ngjarja kriminale, policia ka arritur të skedoj disa pista dhe shumë persona janë shoqëruar. RENEA zhvilloi një aksion mëngjesin e sotëm në Shkodër.
Ndërkohë Prokuroria e Tiranës i ka dërguar shtetit anglez një letër porosi për kapjen e vëllait të Jan Prengës në Angli, ndërkohë që vëllai tjetër është në burg, po në Angli.
Gjithashtu, burime për mediat bëjnë me dije se është identifikuar personi që ka urdhëruar pengmarrjen e Jan Prengës. Ai është Dritan Rexhepaj, i cili ndodhet në një burg në Ekuador.
