Është shpallur këtë mesditë të marte pretenca për ish-anëtarin e Komisionit të Pavarur të Apelimit, Luan Daci.
Prokuroria e Posaçme ka kërkuar dënimin me 1 vit burg, për ish-gjyqtarin Daçi, i cili akuzohet për falsifikim dokumentesh.
Sipas SPAK: “gjyqtari Luan Daci ka falsifikuar dokumentacionin në momentin që aplikoi për t’u bërë pjesë e trupës së KPA-së. Në dokumentacionin e paraqitur në atë kohë nga gjyqtari i KPA, ai fshehu faktin se, kur ishte gjyqtar në gjykatën e Tiranës në 1997, KLD-ja me propozim të ministrit të Drejtësisë e shkarkoi nga detyra për shkelje të ligjit dhe paaftësi”.
Pak muaj më parë, Kolegji i Posaçëm i Apelimit, vendosi për pezullimin nga detyra të ish-gjyqtarit Daci.
Gjyqtari i KPA-së u pezullua nga detyra në muajin korrik, pas kallëzimit në SPAK të anëtarit të KLP-së, Besnik Cani. Gjithashtu kallëzim në SPAK, ka bërë edhe ish- prokurorja e Tiranës, Antoneta Sevdari dhe gjyqtari i Gjykatës së Durrësit Ervin Metalla.
Pasi u mor i pandehur, Daci u pezullua nga detyra nga Gjykata e Posaçme, por Apeli e riktheu atë sërish në detyrë.
Por KPA vendosi pezullimin e gjyqtarit, derisa të merret një vendim të formës së prerë nga ane e GJKKO-së.
Pas konkluzioneve përfundimtare të SPAK, gjatë seancës së sotme, pritet që të bëhet edhe mbrojtja e më pas GJKKO, të japë një vendim për akuzat e ngritura ndaj anëtarit të KPA-së, Luan Daci.
Por tashmë ai është marrë zyrtarisht i pandehur dhe bazuar te ligji në fuqi pezullohet automatikisht çdo prokuror apo gjyqtar që merret i pandehur deri në përfundim të gjyqit.
/GazetaReforma.com/
