Këngëtari Luiz Ejlli është shpallur i pafajshëm nga Gjykata e Apelit, e cila rrëzoi vendimin e mëparshëm të Gjykatës së Fierit që e kishte dënuar me një vit burg për falsifikim dokumentesh.
Vendimi u shpall sot në mesditë, duke e hedhur poshtë tërësisht akuzën penale ndaj tij.
Apeli pranoi ankimin e avokatëve Arbër Hoxha dhe Dritan Metani, duke liruar jo vetëm Ejllin nga çdo përgjegjësi penale, por edhe Fatmir Avdurramanin, që ishte përfshirë në të njëjtën çështje përmes një deklarate noteriale të vitit 2015.
Bëhej fjalë për një dokument të hartuar në kohën kur Ejlli, sipas dosjes hetimore, kishte përdorur vulën e noterit megjithëse i ishte hequr licenca për ta ushtruar këtë profesion.
Dokumenti ishte dorëzuar më vonë në vitin 2022 në Prokurorinë e Lushnjës, për të justifikuar një pasuri të dyshuar.
Gjykata e Apelit e pushoi çështjen për veprën penale të falsifikimit në bashkëpunim, ndërsa la në fuqi vetëm sekuestrimin e disa materialeve që u përfshinë në hetim.
