Fjala e fundit ashtu siç edhe është lajmëruar ditën e djeshme, për sa i përkiste djegies së mandateve i takonte Këshillit Kombëtar të Partisë Demokratike dhe ditën e sotme pas vendimit unanim, deputetët kanë nisur nënshkrimin e dokumentit ku kërkohet dorëheqja.
Djegia e mandateve tashmë është duke u bërë fakt dhe si motivacion edhe në dokument janë vendosur arsyet tashmë të përmendura nga kjo forcë politike.
“Duke pasur parasysh gjendjen e emergjencës kombëtare, ku ndodhet vendi për shkak: të asgjësimit të demokracisë funksionale dhe shtetit të së drejtës; të kapjes së kësaj qeverie në flagrancë duke vjedhur votat e qytetarëve shqiptarë, siç dëshmojnë edhe dosjet gjyqësore të publikuara nga mediat ndërkombëtare; të kapjes së kësaj qeverie në afera flagrante korruptive dhe kriminale;
të eliminimit të parlamentit si një forum i demokracisë; të paralizës së shtetit, shtypjes sistematike dhe dhunimit të të drejtave themelore të njeriut dhe lirive të shqiptarëve duke përfshirë të drejtën e jetës, shëndetit dhe pronës.
Duke mbajtur në konsideratë se për këto shkaqe është krijuar një situatë e paprecedentë e krizës ekonomike, emigracionit masiv kombëtar dhe gjendjes katastrofale e mjerimit social;
Duke mbështetur plotësisht vendimin e Këshillit Kombëtar të Partisë Demokratike të Shqipërisë dhe zgjidhjen politike të ofruar nga opozita e bashkuar të një qeverie tranzitore, të gatshme për të ndërmarrë të gjitha hapat e nevojshëm, që do të garantojnë zgjedhje të lira dhe të ndershme dhe zhbllokimin e procesit të integrimit evropian të Shqipërisë, si dhe hapjes së negociatave me Bashkimin Evropian, përmes zgjedhjeve të lira dhe të ndershme të parakohshme parlamentar.
Unë…, deputet i Kuvendit të Shqipërisë, duke e vlerësuar si të pamundur vijimin e punës në Kuvendin e Shqipërisë, në mbështetje të shkronjës ‘b’, pika 2, e nenit 71 të Kushtetutës, jap dorëheqjen e parevokueshme nga mandati si deputet në Kuvendin e Shqipërisë”, thuhet në letrën e dorëheqjes.
Ballkanweb ka siguruar dokumentin që do të firmosin secili nga deputetët e PD dhe ata që janë në listën e kandidatëve.
Deputetët kanë qenë në të njëjtën mendje dhe të gjithë janë duke përmbushur veprimin final, atë të heqjes dorë, ku ndër të parët ka qenë Ervin Salianji.
Deri më sot mazhoranca është kërcënuar disa herë me djegie mandatesh, mirëpo sot mbërrijmë para faktit se deputetët e partisë më të madhe në opozitë janë duke përmbushur fjalën e tyre dhe tashmë nuk dihet se çfarë do të ndodhë…
