Tërmeti i vitit 2019 vlen të rikthehet sërish në vëmendje për cilësinë e ndërtimeve dhe lejet e dhëna pa kriter nga qeveria aktuale por dhe ajo e mëprashme.
Sipas Inxhinierit të ndërtimit, Gëzim Beqaj e vë theksin te cilësia e ndërtimeve, pavarësisht fortësisë së tërmetit. Beqaj thotë se ka munguar veprimi i qeverisë për mirëmbajtjen e një pjese të mirë të ndërtesave të amortizuara.
“Inxhineria adoptoi me dëshirë dhe iniciativë eurokodet (jo me detyrim ligjor) dhe kjo është për tu përshëndetur. Nga ana tjetër është përgjegjësi e politikës shqiptare, e qeverisë shqiptare që të marrin masa të menjëhershme. Deri tani në dijeninë time kanë dalë udhëzime apo akte nënligjore por nuk mjafton me kaq,” – u shpreh inxhinieri në një intervistë për Euroneës.
Si specialist i ndërtimeve, ai i drejtoi dhe disa kritika qeverisë. Sipas Beqaj nuk duhet fokusuar vëmendja vetëm te vendosja e standarteve, por dhe te mbikqyrja dhe zbatimi i punimeve.
Ai tha se që nga vitit 2009 qeveria shqiptare është në moszbatim të një ligji që quhet “Ligji mbi profesionet e rregulluara”, gjë që nënkupton se qeveria shqiptare ka qenë e detyruar të krijojë “Urdhrin e inxhinierit” dhe nuk e ka bërë.
Është pikërisht ky urdhër, siç sqaroi inxhinieri, që ndikon në formimin dhe në ndëshkimin e inxhinierëve të ndërtimit dhe rrjedhimisht sjell përgjegjësinë e plotë në ndërtime.
