Bashkimi Evropian po përpiqet që brenda muajit qershor të nxjerrë një certifikatë të COVID-19, në mënyrë që qytetarët të udhëtojnë më lehtë brenda bllokut gjatë periudhës së verës. Kërkesën për një pasaportë të tillë po e kërkojnë vendet anëtare të Bashkimit Evropian të cilat janë të varura nga turizmi. Ata janë shprehur njëzëri se dokumenti është një përparësi për qytetarët dhe shpresojnë që certifikatën ta kenë në dorë para verës.
“Kjo është një përparësi për qytetarët tanë dhe prandaj besoj se do të kemi certifikatën para verës”, -tha zëvendës presidenti i Komisionit Evropian, Marosh Sefçovicc, pas një takimi të ministrave të jashtëm të bllokut. Vendimi do të lejonte ata që janë vaksinuar, të rikuperuar nga COVID-19, ose me rezultate negative të testit të kalojnë kufijtë brenda bllokut, ku aktualisht ka kufizime.
Zyrtarët e Bashkimit Evropian janë shprehur se askujt nuk do detyrohet që të përdoret çertifikata e BE-së dhe se dokumenti që do të jepet nuk duhet të konsiderohet si një pasaportë vaksine ose të përdoret si mjet diskriminimi.
Shumë vende në BE kanë filluar lehtësimin e masave kundër pandemisë dhe synojnë që përmes sezonin të udhëtimeve verore të ringjallin ekonomitë lokale. Pandemia globale e COVID-19, ka marrë shumë jetë njerëzish dhe numri i të infektuarve në disa vende është vërtet alarmant. Vaksina ka sjell një ulje të numrit të të infektuarve në vendet ku është përdorur./REL
