Një grup i strukturuar kriminal që operonte përmes një platforme të rreme investimesh online është goditur nga një operacion ndërkombëtar i zhvilluar nga autoritetet e Gjermanisë, Shqipërisë, Qipros, Britanisë së Madhe dhe Izraelit, me mbështetjen e Eurojust dhe Europol.
Ky rrjet kishte mashtruar mbi 100 persona në mbarë botën, duke përfituar mbi 3 milionë euro.
Sipas hetimeve, grupi përdorte një faqe të rreme që premtonte fitime të mëdha për investime të vogla.
Pasi viktimat bindeshin të investonin shuma të para të vogla, përmes grafikëve të manipuluar dhe presionit psikologjik nga persona që paraqiteshin si “brokerë”, ato shtyheshin të jepnin edhe më shumë para. Në realitet, fondet nuk investoheshin kurrë, por përfundonin në duart e grupit.
Hetimet nisën në Gjermani në vitin 2022, pas kallëzimit të një çifti që ishte mashtruar. Gjurmimi i rrjeteve financiare çoi në identifikimin e një organizate ndërkombëtare kriminale.
Një operacion i parë u zhvillua në Belgjikë dhe Letoni në shtator 2022, ku u arrestuan dy persona dhe u sekuestruan prova të rëndësishme që zbuluan strukturën dhe drejtuesit e rrjetit.
Faza e dytë e operacionit u zhvillua më 13 maj 2025 në Shqipëri, Qipro dhe Izrael. U ushtruan kontrolle të njëkohshme në disa lokacione, duke sekuestruar pajisje elektronike, dokumente dhe para cash.
Në Qipro u arrestua një i dyshuar, për të cilin po shqyrtohet ekstradimi drejt Gjermanisë.
Në Shqipëri, veprimet u koordinuan nga SPAK, në bashkëpunim me Drejtorinë për Hetimin e Krimeve Kibernetike dhe Forcën e Posaçme Operacionale, në kuadër të një letërporosie nga autoritetet gjermane.
Eurojust siguroi koordinimin gjyqësor nga selia në Hagë, ndërsa Europol ngriti një komandë virtuale për të garantuar bashkërendim në kohë reale.
Operacioni është pjesë e platformës europiane EMPACT, që synon goditjen e krimit të organizuar dhe mashtrimeve financiare për periudhën 2022–2025.
