Gazetarja Aida Topalli ka zbuluar detaje mbi funksionimin e faqeve online të eskortave në Shqipëri, duke theksuar se ky aktivitet zhvillohet në mënyrë të organizuar dhe me tarifa të konsiderueshme.
E ftuar në emisionin “Top Story”, ajo shpjegoi se vajzat që operojnë në këto platforma kanë mundësi të zgjedhin vetë vendin ku punojnë, gjuhën me të cilën komunikojnë si edhe nivelin e tarifave që aplikojnë. Sipas saj, aktualisht nuk ekziston një shërbim me çmim nën 200 euro.
“Zgjedhin vendin nga e duan. Gjuhën me të cilën flasin. Tarifën, nëse e duan të lirë ose jo. Nëse flasim aktualisht, nuk ka tarifë nën 200 euro. Shërbimet vijojnë nga 30 minuta dhe më pas vijnë duke u rritur. Nis nga 200 euro më e lira dhe më pas rritet”, u shpreh Topalli.
Ajo shtoi se fitimet ditore mund të jenë shumë më të larta. Duke iu referuar një burimi në seksionin e trafiqeve, gazetarja tregoi rastin e një shtetaseje braziliane, e cila sipas intervistës së marrë, arrinte të fitonte nga 600 deri në 800 euro në ditë.
“Po bisedoja me një burim timin në seksionin e trafiqeve dhe në një intervistë që kishte marrë një braziliane, të shoqëruar ditëve të fundit, në ditë bënte 600-800 euro. Këto vajza sigurisht që kanë disa përgjegjës. Kjo është minimalja. Ka vajza që marrin edhe tarifa më të larta”, deklaroi ajo.
Topalli theksoi gjithashtu se një pjesë e vajzave që ushtrojnë këtë aktivitet janë nëna me fëmijë, të cilat lëvizin nga një vend në tjetrin për periudha të shkurtra kohore, duke qëndruar zakonisht dy javë në një vend dhe më pas duke u kthyer në vendin e tyre të origjinës.
Sipas saj, ky aktivitet kryhet me dijeni të plotë nga vetë ato, shpesh i nxitur nga vështirësitë ekonomike që përballen në vendet e tyre.
