Të gjithë jemi në pritje të sezonit të ri futbollistik nga ana e klubeve të Superiores, pasi ka kaluar më shumë se një muaj dhe futbollistët nuk kanë zbritur ende në fushë.
Liga Profesioniste e Futbollit në bashkëpunim me krerët e klubeve të Superiores kanë vendosur të bojkotojnë këtë sezon pasi duan që qeveria të plotësojë katër kërkesat e tyre.
Por edhe pas disa takimeve mes qeverisë dhe Ligës ende nuk ka një zgjidhje, ndërkohë në lidhje me këtë i dërguari i qeverisë për këtë çështje, deputeti Fidel Ylli ka thënë se deri më tani janë plotësuar tre prej kërkesave të Superiores.
“Është gjetur dakordësia për tre pika. Për një nga këto pikat nuk është se nuk është gjetur zgjidhja, por ky është një vendim politik, që do të thotë se në rast se Liga kërkon faljen e gjobave dhe kamatëvonesave, ky është vendim që e merr Parlamenti, nuk e marr as unë dhe as komisioni. Duhet bërë një ligj apostafat faljeje, dhe unë nuk jam dakord që të falet vetëm futbolli, por unë jam dakord që të falen edhe bizneset e tjera. Ky është një vendim që e merr kryeministri.
Pika më delikate është ligji i sponsorizimit. Liga ka sjellë një propozim, ne jemi ulur si grup dhe kemi bërë debate, dhe ne kemi dalë në një konkluzion dhe po ti shikosh dy raporte janë të njëjta. Liga kërkon një lloj garancie për tatim-fitimin. I kemi bërë sot një memo kryeministrit, ia kemi çuar dhe besoj se deri të premten ne do të kemi një zgjidhje përfundimtare. Zgjidhja është bërë. Sigurisht që është gjetur një gjuhë. Janë në tavolinë dy drafte. Ministrja ishte shumë e hapur. Jam i bindur se do gjendet zgjidhja, dhe me këtë ligj nuk do të fitojë vetëm futbolli, por i gjithë sporti shqiptar”, tha ai.
Por mos ndoshta deputeti Ylli harron se Superiorja ka shtruar në tavolinë katër kërkesa dhe pa zgjidhjen e plotë të tyre nuk kthehen në fushë. Kujtojmë se edhe në takimin e fundit të zhvilluar mes palëve kreu i Ligës, Edvin Liobohova tha se ende nuk është gjetur një zgjidhje për Ligjin e Sponsorizimit, i cili ndihmon klubet në procesion e privatizimit dhe shumëfishimin e buxhetit të tyre.
