Deputetja e Partisë së Lirisë, Erisa Xhixho, ka ngritur alarmin për situatën kritike në sistemin gjyqësor shqiptar, duke deklaruar se stoku i dosjeve nëpër gjykata ka arritur në mbi 400 mijë. E ftuar në emisionin “Syri Digjital” në SYRI TV, përballë moderatorit Bled Marku, Xhixho tha se vonesat e gjata dhe mungesa e efikasitetit në dhënien e drejtësisë po e çojnë qytetarin drejt dëshpërimit ekstrem.
“Pas vrasjes së gjyqtarit të Apelit, u bë e qartë se siguria është zero. Çështja është pse qytetari arriti në atë veprim ekstrem. Ne e kemi trajtuar shumë herë këtë problem, që është zvarritja e gjyqeve,” u shpreh Xhixho, duke theksuar se duhet analizuar rrënja e problemit për të gjetur një zgjidhje të qëndrueshme.
Sipas saj, reforma në drejtësi, e nisur në vitin 2016 me qëllimin për të krijuar një sistem të shpejtë dhe të drejtë, ka prodhuar të kundërtën. “Në fakt duhet të kuptojmë shkaqet për të rregulluar këto pasoja dramatike që ka sjellë reforma në drejtësi, që u nis me një qëllim shumë të madh, që të arrinte një drejtësi të shpejtë, efikase dhe me integritet,” tha ajo.
Deputetja theksoi se pas gati një dekade nga nisja e reformës, rezultatet janë zhgënjyese. “Vijmë pas pothuajse një dekade, që prej 2016, dhe bëjmë një analizë se çfarë efektesh ka sjellë kjo reformë në drejtësi. Sot, fatkeqësisht, 90% e shqiptarëve nuk marrin drejtësi. Nga të dhënat që kemi, 78% e çështjeve në gjykatë janë tej afateve të një procesi të rregullt ligjor,” deklaroi Xhixho.
Ajo e cilësoi situatën si dramatike, duke bërë me dije se vetëm në shkallën e parë ka mbi 200 mijë dosje stok, ndërsa në total numri kalon 400 mijë. “Janë mbi 200 mijë dosje stok, dhe avokatët më korrigjuan duke më thënë se këto janë vetëm të shkallës së parë, sepse nëse merr të gjitha shkallët e gjyqësorit janë mbi 400 mijë dosje. Pra mbi 2/3 e popullsisë sot nuk merr drejtësi,” shtoi ajo.
Sipas deputetes, proceset gjyqësore janë zgjatur në mënyrë të papranueshme. “Sot për të kaluar 3 shkallët e gjyqësorit shkon nga 12 në 15 vite. Para 2016 ti ke pasur një bilanc ku brenda 4 vitesh merrje një vendim gjykate, ndërsa sot e merr drejtësinë pas 15 vitesh,” nënvizoi Xhixho.
Në përfundim, ajo akuzoi se harta e re gjyqësore ka qenë ndër vendimet më të dëmshme të reformës. “Harta e re gjyqësore bëri damkën më të madhe të kësaj reforme gjyqësore,” deklaroi Xhixho.
