Nuk ka ende asnjë shenjë nga i riu Arjan Sala që u fut në magazinën në flakë të “Casa Italia” për të shpëtuar kolegët që prej ditës së mërkurë. Zjarrfikësit janë duke punuar për shuarjen e flakëve ndërsa ekipet e shpëtimit mbrëmjen e sotme janë future në katet e nëndheshme me qen kërkimi.
Në një intervistë për ABC News, komandanti i grupit të stacionit kryesor në qendrën e zjarrfikësve në Tiranë, Përparim Boshnjaku ka thënë se kjo ka qenë ngjarja më e rëndë që i ka ndodhur në 30 vite punë dhe se po e përjetojnë njëjtë si ndërkombëtarët. Ndërkohë, Boshnjaku ka deklaruar se zjarri është drejt eliminimit.
“Dua ti shpreh ngushëllimet familjes së Arjanit. Është ngjarja më e rëndë që na ka ndodhur. Por përjetojmë edhe ne si familjarët . Nuk kemi qetësi derisa të gjejmë trupin. Zjarri është drejt eliminimit. Po kërkojmë me qen. Çdo gjë është nën kontroll”, ka thënë ai.
Boshnjaku tha se kanë shkuar ër të fikur zjarrin sapo janë lajmëruar edhe pse ka qenë një situatë shumë e vështirë. Ai ka thënë se zjarrfikësja i ka patur mjetet në dispozicion.
“Që në fillim jemi lajmëruar, kemi ardhur nga banesat tona dhe i kemi marrë pjesë në fikjen e zjarrit. Zjarri ka qenë në situatë të vështirë. Ishte një situatë shumë e vështirë. Na është lajmëruar që ka person brenda. Jemi munduar të kërkojmë edhe personin. Mjetet i kemi pasur. Kanë qenë të instaluar aparatet që mbusheshin me oksigjen”, tha Boshnjaku.
Më tej ai ka thënë se magazine është e gjitha nën kontroll dhe se terreni kryesor është kontrolluar dhe se e rëndësishme është të gjendet trupi i viktimës.
“Për momentin kemi kërkuar planimetrinë e ndërtesës, si mund të ndërhynim. Kemi marrë informacione për parametrat. Magazina ishte shumë e madhe. Në këto momente e kemi të gjithë magazinën nën kontroll. Terrenin kryesor e kemi kontrolluar. Herën e katërt që hyra me aparat, ndodhi një defekt, dola deri te shkallët më ndihmuan kolegët e mi. Për momentin është e rëndësishme që të gjendet trupi i viktimës”, ka thënë Boshnjaku.
