Distria Krasniqi bëri histori ditën e sotme kur ia doli të fitonte medaljen e arit në xhudo në kategorinë deri në 48 kilogramë. Teksa të gjithë u krenuan me fitoren e saj, ishte familja e sportistes që përjetoi emocione më të mëdha. Nëna e Distrias ka treguar për Klan Kosova se fitorja e së bijës ka qenë një emocion i veçantë. Ajo rrëfeu se kanë qëndruar pa gjumë, por ia ka vlejtur.
Remzije Krasniqi ka treguar se Distria ka qenë në stres me përgatitjet e më pas për kundërshtarin që do i caktonte shorti.
“Emocion i veçantë. Kemi mbetur pa gjumë, por ia ka vlejtur. Shumë ka qenë e stresuar. Nuk ke pasur mundësi të flasësh me të dhe ta përkrahësh. Ne e kemi ditur se si është ndjerë posa ka ardhur nga stërvitjet. Ka qenë stres së pari përgatitjet, pastaj me kë do të luftojë me kë do t’i bie shorti”, ka thënë ajo.
Ndër të tjera Remzije Krasniqi ka treguar se e bija i ka marrë në telefon para se të merrte medaljen dhe i ka pyetur si janë, ndërsa është qetësuar kur ka parë të atin.
“Para se të merrte medaljen na ka mërrë në telefon me video. Ka pyetur se si jemi ne, e ka kërkuar babin e saj dhe kur e ka parë është qetësuar”, tregoi ajo.
Distria Krasniqi ia doli të fitonte medaljen e dytë për Kosovën në një Olimpiadë. Majlinda Kelmendi fitoi të parën në “Rio 2016”, po në sportin e xhudos. Krasniqi mundi në finale japonezen Funa Tonaki.
