Është kthyer gjithnjë e më shumë në problematikë emigrimi i paligjshëm i shqiptarëve drejt Britanisë së madhe me gomone. Autoritetet britanike kanë raportuar se shqiptarët mbajnë vendin e parë për emigrimin e paligjshëm me gomone. Kryeministri Edi Rama gjatë konferencës së sotme për turizmin ka folur dhe në lidhje me këtë problematikë ku dha një mesazh për të rinjtë që tentojnë të emigrojnë në mënyrë të jashtëligjshme duke rrezikuar dhe jetën shpeshherë. Duke konstatuar se shumat e mëdha monetare që paguajnë për t’u larguar në kërkim të parajsës mund t’i përdorin për të ndërtuar të ardhmen në Shqipëri, Rama ftoi “djemtë e Kukësit” që paundët t’i investojnë në sektorin e agroturizmit dhe sipas tij qeveria do t’i përkrahë.
“Ata që paguajnë nga 30 mijë paund për të marrë rrugët e emigracionit klandestin në kërkim të parajsës që nuk kanë për ta gjetur, me ato 30 mijë paund mund të bëjnë ekonominë e tyre atje në Kukës. Le të shkojnë dhe të pyesin. Ne jemi gati t’i mbështesim ata të rinjtë që duan të bëjnë agroturizëm në Kukës. Fitojnë shumë më shumë se nga çdo punë në të bardhë apo të zezë në Angli. Nga ana tjetër është fakt që agroturizmi kudo po jep rezultat për ata që e marrin përsipër”, nënvizoi Rama.
