Qeveria italiane po vazhdon operacionin për dërgimin e emigrantëve në Shqipëri, duke bërë disa ndryshime në trupat gjyqësore që trajtojnë këtë çështje.
Sipas agjencisë “Ansa”, gjykimet për emigrantët nuk do të kryhen më nga seksioni i emigracionit i gjykatës së Romës, që deri tani ka urdhëruar kthimin në Itali të 19 emigrantëve të sjellë në kampin e Gjadrit nga anija Meduza.
Gjykata e Romës ka vendosur të dërgojë këtë çështje në Gjykatën Evropiane, për të kërkuar një verdikt mbi konceptin e “vendeve të sigurta”.
Relatorja Sara Kelany ka kërkuar ndryshimin e trupës gjyqësore, pasi qeveria italiane vlerëson se gjyqtarët aktualë janë paragjykues ndaj emigrantëve dhe kundërshtojnë politikat e qeverisë, duke u bërë pengesë për procedurat.
Mazhoranca italiane po promovon amendamentin e Kelany, i cili modifikon ligjin 46 të vitit 2017, duke zhvendosur juridiksionin për vlefshmërinë e paraburgimeve nga seksioni i emigracionit në Gjykatën e Apelit të Romës, me gjyqtar Giuseppe Meliadò në krye. Vendimet e kësaj gjykate mund të apelohen në Gjykatën e Lartë të Kasacionit.
