GJKKO ka reaguar në lidhje me kërkesën e gjyqtares Elsa Ulliri për t’u tërhequr nga shqyrtimi i çështjes “Partizani”, ku të pandehur janë Sali Berisha, Jamarbër Malltezi dhe tre persona të tjerë.
Në njoftim zyrtar thuhet se çdo vendim mbi këtë kërkesë pritet të komunikohet në seancën e caktuar për datën 21 korrik.
Megjithatë, pavarësisht dorëheqjes së kërkuar, gjyqtarja Ulliri do të jetë e pranishme në sallën e gjyqit, ndërsa trupa gjykuese mbetet e pandryshuar, por aktualisht nuk mund të marrë vendime për çështjen.
“Nisur nga interesi i lartë nga ana juaj për t’u informuar nëse gjyqtarja Elsa Ulliri ka paraqitur kërkesë për dorëheqje nga çështja penale në ngarkim të të pandehurve Sali Berisha, Jamarbër Malltezi, etj…, me porosi të Zëvendëskryetarit të Gjykatës Z. Erjon Bani, ju bëjmë me dije se lidhur me këtë pjesë do të informoheni në seancën gjyqësore të rradhës, datë 21.07.2025, ora 10:30, ku trupi gjykues do të relatojë në seancë nëse është paraqitur ndonjë kërkesë e tillë si dhe vendimmarrja e titullarit, në rast se ka pasur vendimmarrje”, njofton GJKKO.
