Një ngjarje e rëndë është shënuar në Athinë, ku një shqiptar është vrarë në burgun e Koridhalos në Greqi.
Viktima është identifikuar si Albert Bako.
Por Bako nuk është i panjohur për mediat dhe policinë greke, pasi 32-vjeçari shqiptar, ishte nën hetim për vrasjen e avokatit grek, Mihal Zafiropoulos, ngjarje kjo që shkaktoi reagime të forta në shtetin fqinj.
Për këtë rast ai është pyetur më parë nga policia, dhe ka thënë: “Unë nuk doja ta vrisja avokatin Mihal Zafiropoulos, doja vetëm ta trembja”.
Momenti i arrestimit të shqiptarit u publikua nga të gjitha mediat, ndërsa Bako deklaroi se disa persona e kishin paguar 3 mijë euro për ekzekutimin e avokatit të njohur grek.
Gjithashtu Bako akuzohej se kishte hapur zjarr në një lokal në Pire, ku plagosi 14 vetë.
Ai sapo ishte transferuar nga burgu i “Chania” në atë të “Korydallos”, por ky transferim rezultoi fatal për jetën e shqiptarit. Mediat greke raportojë se pas vrasjes së Bakos qëndron një bandë rivale, e cila kishte mësuar për transferimin e 32-vjeçarit.
Shqiptari i ekzekutuar sot në mëngjes ishte pjesë e një grupimi nacionalist me rreth 145 mijë anëtarë në rrjetet sociale, të cilët kishin si “betim” hakmarrjen ndaj Greqisë për vrasjen makabre të shqiptarit Ilia Kareli në burgun e Nigritas.
