Një atentat me armë zjarri ndodhi në orët e para të mëngjesit të djeshëm në Elbasan, ku një 22-vjeçar mbeti i pajetë.
Ka qenë vëllai i 22-vjeçarit Klevi Brahos që ka parë gjithçka me sytë e tij. I riu kishte disa ditë që kishte ardhur nga Italia dhe po qëndronte në banesën e tij.
Siç mësohet, Klevi ishte duke ecur në këmbë në rrugën nacionale pranë fshatit Murras, ku edhe jetonte. Ai i është shmangur atentatit teksa ka qenë i vetëm, ndërsa kthehej për në shtëpi, pasi kishte qenë në një lokal të zonës.
Në momentin që ka qenë duke ecur, shumë pranë një pike karburanti, një person i ka dalë para duke iu drejtuar me fjalët:
“Ti je Klevi?”
22-vjeçari ka ditur të manovrojë duke i thënë “jo” dhe është larguar. Sipas gazetës “Panorama”, Klevi i ka telefonuar të vëllait pasi kishte përshkuar një distancë në këmbë. Ai kishte shkuar menjëherë me makinë, por rrugës për në banesën e tyre ata janë ndjekur nga nje mjet.
Pasi janë afruar, autorët kanë qëlluar me breshëri automatiku në drejtim të makinë tip “Audi”, ku gjendeshin dy vëllezërit.
Ende nuk është e qartë pse Aleksandri ka ndaluar mjetin dhe vëllai i tij për t’u shpëtuar plumbave ka dalë nga mjeti në tentativën për t’u fshehur.
Kanë qenë familjarët dhe banorët e fshatit që kanë dalë jashtë, pasi kanë dëgjuar të shtënat e armës.
Ata kanë identifikuar 30-vjeçarin shumë pranë derës së mjetit të plagosur dhe e kanë nisur direkt në Spitalin Rajonal të Elbasanit.
Me shenja jete është gjetur edhe Klevi, i shtrirë dhe i plagosur rëndë poshtë një ure. Por, gjatë transportimit për në spital, 22- vjeçari ndërroi jetë.
