Struktura e Posaçme Anti-Korrupsion (SPAK), ka mbyllur hetimet për përfshirjen e Blendi Tetës në vrasjen e Santjago Malkos më datë 27 gusht të 2019-ës pranë zonës së Kinostudios në Tiranë.
Bëhet me dije se dosja e Blendi Tetës është veçuar nga dosja e të dyshuarve të tjerë, ndërsa prokuroria ka si të dyshuar në këtë rast, klanin Duka në Tiranë.
Dyshohet se Blendi Teta kishte rol në mbajtjen nën vëzhgim të Malkos dhe fshehjes së gjurmëve të autorëve.
Fillimisht Blendi Teta u hetua për “moskallëzim krimi“, por hetimet më të fundit rezultojnë se, Blendi Teta ka qenë në dijeni për atentatin ndaj Santiago Malkos, duke e akuzuar më pas edhe për rolin e ndihmësit në akuzën “vrasje me paramendim”.
Kujtojmë se Malko ka lëvizur pasditen e atentatit nga spitali i pediatrisë drejt rrugës Xhanfizë Keko, pasi atje kishte djalin të sëmurë dhe sipas prokurorisë, ka qenë pikërisht Blendi Teta me makinën e tij që ka ndjekur objektivin nga spitali drejt vendit ku u krye dhe atentati.
Gjithashtu edhe personat e shpallur në kërkim akuzohen për veprën penale “vrasje me dashje në bashkëpunim“, “armëmbajtje pa leje” gjithashtu dhe “krijimin e grupit të strukturuar kriminal“.
Sipas dosjes në prokurori, theksohet se grupi mafioz kishte planifikuar deri në detaje ekzekutimin e ish-policit./GazetaReforma.com/
