Ekzekutimi i Charlie Kirk, i dyshuari “hermetik” nuk pranon krimin

Guvernatori i Utah, Spencer Cox, deklaroi sot se i dyshuari për vrasjen e aktivistit konservator Charlie Kirk “nuk po bashkëpunon” me autoritetet dhe nuk ka pranuar autorësinë e krimit.

Sipas Cox, 22-vjeçari Tyler Robinson, i akuzuar si autor i ngjarjes, do të dalë të martën përpara gjykatës për t’u akuzuar zyrtarisht. Ai ndodhet aktualisht në paraburgim në Utah.

Hetuesit ende nuk kanë përcaktuar motivin përse Robinson dyshohet se u ngjit në çatinë e një ndërtese në Universitetin e Luginës së Utah dhe qëlloi me armë zjarri drejt Kirkut, duke e goditur në qafë nga një distancë e largët, të mërkurën e kaluar.

“Robinson nuk ka rrëfyer. Ai nuk po bashkëpunon, por të gjithë përreth tij po bashkëpunojnë dhe kjo është shumë e rëndësishme,” tha guvernatori Cox në intervistë për emisionin “This Week” të ABC-së.

Një nga personat që ka dhënë dëshmi për hetuesit është shoku i dhomës së Robinson, të cilin Cox e përshkroi si “një burrë në tranzicion drejt një gruaje”, duke shtuar se ai ka qenë “jashtëzakonisht bashkëpunues”.

I pyetur nga CNN nëse identiteti gjinor i shokut të dhomës kishte ndonjë lidhje me hetimin, guvernatori u shpreh: “Kjo është ajo që po përpiqemi të kuptojmë tani… Është e lehtë të nxitohemi në përfundime, por kemi gëzhojat, prova të tjera mjeko-ligjore që po na vijnë në dorë dhe po përpiqemi t’i bashkojmë pjesë-pjesë.”