Julian Gjoshi, autori i vrasjes së 50-vjeçarit Alfred Dedja, do të dalë sot para Gjykatës për t’u njohur me masën e sigurisë.
Gjoshi, i cili u vetëdorëzua një ditë pas ngjarjes së rëndë të 1 dhjetorit në Ndroq, ka deklaruar se e vrau Dedjan për shkak të ofendimeve të përsëritura nga viktima.
Grupi hetimor ka dyshime të forta se motivi i vërtetë i ngjarjes ka të bëjë me prishjen e pazareve të drogës. Arma e përdorur gjatë ekzekutimit nuk është gjetur ende, ndërsa policia ka vazhduar kërkimet në lokalin ku ndodhi ngjarja. Gjoshi ka thënë se e ka hedhur armën në shkurre pranë lokalit, por ende nuk është gjetur.
Ngjarja e rëndë ka ndodhur rreth orës 15:30 të 1 dhjetorit në një lokal në Ndroq, ku fillimisht u raportua për të shtëna dhe më pas për një viktimë.
Alfred Dedja humbi jetën nga të shtënat, ndërsa Julian Gjoshi u identifikua si autor i vrasjes dhe u arratis pas ngjarjes. Sipas hetimeve, ngjarja ndodhi pas një sherri në lokal, ku Gjoshi qëlloi Dedjan për vdekje pas një debati të ashpër.
Gjoshi është kunati i Altin Hajrit dhe ka pasur probleme me ligjin, duke u arrestuar në vitin 2021 për armëmbajtje pa leje. Viktima, Alfred Dedja, kishte precedentë penalë për vjedhje dhe trafikim lëndësh narkotike.
