Ngjarjet e rënda që kanë “mbërthyer” qytetin e Elbasanit ditët e fundit kanë bërë që të fillojnë lëvizjet e para. Shefi i hetimit të krimeve në Drejtorinë e Policisë së Qarkut të Elbasanit ka qenë i pari që është liruar nga kjo detyrë. Lëvizja mbërrin pas ngjarjeve të bujshme kriminale që kanë tronditur këtë qytet brenda tri javëve.
Gjon Gecaj është transferuar nga pozicioni i shef krimesh në Elbasan në sallën operative të Drejtorisë së Policisë në Qarkun e Lezhës. Vendin e tij e zë Krenar Guçe, oficer në sektorin e krimeve të rënda në policinë e shtetit, ndërsa më parë shef i sektorit të antidrogës në Policinë e Tiranës.
Lëvizjet në policinë e Elbasanit mbërrijnë pas vrasjes së Pjerin Xhuvanit, Liljana Buzos dhe Everest Çakas.
Xhuvani u vra më 21 prill gjatë fushatës elektorale në një ngjarje që dyshohet se pati shkëmbim zjarri. Prokuroria ka akuzuar Arbër Paplekën, ish-efektiv i RENEA-s, që në ato ditë ishte angazhuar nga Partia Demokratike si pjesë e asaj që i quajti struktura e mbrojtjes së votës.
Ngjarja tjetër e rëndë ishte më 6 maj, kur Koço Buzo ekzekutoi bashkëshorten e tij Liljana Buzo. Krimi ndodhi para gjykatës së Elbasanit, ku Liljana Buzo kishte nisur procedurat e divorcit.
Krimi i fundit që tronditi Elbasanin ndodhi dy ditë më parë, kur u vra në një atentat mafioz Everest Çaka në sy të bashkëshortes së tij, që mbeti e plagosur lehtë. Pistat hetimore për këtë vrasje janë disa dhe lidhen kryesisht me aktivitetin e viktimës jashtë Shqipërisë dhe hakmarrje për ngjarje të mëparshme.
