Ekstradohet bosi shqiptar i drogës me aktivitet kryesisht në Italinë Veriore. 25 vjeçari u ekstradua në bazë të urdhër arrestit ndërkombëtar të lëshuar nga prokuroria italiane.
Sipas mediave italiane, hetuesit në sajë të bashkëpunimit të policisë shqiptare, e kishin lokalizuar atë në Durrës, qytetin ku i riu ishte strehuar pasi kishte ikur nga Italia.
Bëhet fjalë për Mateo Gjalpin nga Shijaku, të cilit bashkë me dy shqiptarë të tjerë, iu sekuestruan 42 kg heroinë dhe disa armë, në një apartament në Ravenna në shkurt 2018.
25-vjeçari është trafikanti i dytë i dyshuar i arrestuar si pjesë e operacionit anti-drogë të quajtur ‘Pike’. Para tij, u arrestua kushëriri i tij 27-vjeçar Gazmend Gjepali, i cili u prangos në vitin 2018.
Operacioni arriti kulmin në arrestimin e 27-vjeçarit, bllokuar më 15 shkurt 2018 në Rimini nga agjentët e antidrogës, ndërsa ai po shpërndante dy kilogramë kokainë dhe një hashash të fshehur në makinën e tij të përgatitur posaçërisht për transport.
Në të njëjtën mbrëmje të arrestimit, gjatë kontrolleve në shtëpitë që ai përdori së bashku me kushëririn e tij Mateo dhe 32-vjeçarin Armand Kapidani, anëtari i tretë i dyshuar i grupit dhe ende i arratisur, hetuesit gjetën një laborator për prerjen, përgatitjen dhe paketimin e sasive të mëdha të drogës.
Brenda ambienteve, u sekuestruan 42 kg heroinë, 80 kg lëndë prerëse, përzierës, një mikser profesional për të përzier përbërësit, pistoleta dhe një shtypës hidraulik me kallëpe për paketimin e pakove.
