Gjykata e Strasburgut, institucioni më i lartë për mbrojtjen e të drejtave të njeriut, i kërkon shtetit shqiptar që të mos e dëbojë turkun Selami Simsek, i cilësuar si gylenist.
Simsek nuk do të dëbohet derisa të përfundojë gjyqi ndaj tij. Ai pretendon se persekutohet nga shteti turk dhe i rrezikohet jeta nëse ekstradohet atje. Turqia e konsideron atë si mbështetës të Fetullah Gylen dhe të përfshirë në grushtin e shtetit të 2016-ës.
Ai u ndalua në aeroportin e Rinasit në janar të këtij viti gjatë kohës kur po tentonte të largohej nga Shqipëria me një vizë kanadeze të falsifikuar.
Autoritetet shqiptare ia refuzuan kërkesën për azil me argumentimin se pretendimet e tij ishin abuzive dhe “dukshëm të pabazuara”.
Një grup eurodeputetësh kanë kërkuar më herët që Simsek të mos ekstradohet në Turqi, e nëse një gjë e tillë ndodh, do të ndikojë në integrimin e vendit në Bashkimin Europian.
Kujtojmë se më herët avokati i tij ka paditur institucionet shqiptare që nuk i pranuan kërkesën për azil politik në vendin tonë, por Gjykata Administrative e Tiranës ka rrëzuar padinë e tij.
Më parë ka patur edhe disa herë tratativa nga shërbimi informativ shtetëror (SHISH), në bashkëpunim me MIT-in turk (shërbimin informativ turk), për kapjen në befasi e më pas ekstradimin nëpërmjet Rinasit drejt Turqisë, të disa prej anëtarëve të Organizatës FETO, e quajtur në Turqi si organizatë terroriste dhe përgjegjëse për tentim-grusht shtetin e korrikut të vitit 2016-të,/Gazetareforma.com/
