Ditën e sotme në ambientet e Presidencës është hapur një ekspozitë me foto të ikonave të rralla murale. Nisma është ndërmarrë në kuadër të Ditës Ndërkombëtare të Diversitetit Kulturor, Dialogut dhe Zhvillimit dhe 15-vjetorit të Pavarësisë së Malit të Zi.
Në një postim në Facebook, Meta shkruan se duhet punuar për forcimin dhe promovimin e bashkëjetesës harmonike, tolerancën dhe mirëkuptimin mes pakicave. E gjitha kjo duke mbrojtur trashëgiminë kulturore shqiptare dhe europiane.
Postimi i plotë:
Në kuadër të Ditës Ndërkombëtare të Diversitetit Kulturor, Dialogut dhe Zhvillimit, si dhe me rastin e 15-vjetorit të Pavarësisë së Malit të Zi ishte kënaqësi, që Institucioni i Presidentit të hapte dyert për një ekspozitë të veçantë, të ideuar nga përfaqësues të pakicës malazeze në vendin tonë, me fotografi të ikonave të rralla murale.
Duhet të vazhdojmë të punojmë edhe më shumë, të gjithë së bashku, për të forcuar dhe promovuar bashkëjetesën tonë harmonike, tolerancën dhe mirëkuptimin mes të gjitha pakicace, duke mbrojtur njëkohësisht diversitetet e tyre, si një pjesë e rëndësishme e trashëgimisë kulturore shqiptare, por edhe europiane.
Në rajonin tonë, çdo komb është diku shumicë dhe diku pakicë. E vetmja rrugë për të ecur përpara, në paqe, në begati dhe në prosperitet është që në çdo shtet, pakicat të respektohen njëlloj, sipas standardeve më të avancuara europiane.
