Zëvendësimet në pozicione të rëndësishme në administratën publike tashmë janë bërë të zakonshme, mirëpo mesa duket situatat ndryshojnë nga njëri emërim në tjetrin.
Kanë qenë dy zhvillime shumë të rëndësishme mbrëmjen e djeshme dhe ditën e sotme, të cilat janë të lidhura ngushtë me njëra-tjetrën.
Së pari bëhet fjalë për shkarkimin e krahut të djathtë të ish- Ministrit Damian Gjiknuri, Etleva Kondi, e cila deri ditën e djeshme ka mbajtur vendin e Drejtoreshës së Partneriteteve Publik-Privat dhe një nga njerëzit me të cilën Gjiknuri ka ndërmarrë gjithë hapat për realizimin e procedurave të PPP-ve të dhëna.
Ndërsa lajmi i dytë i takon një auditimi të rëndësishëm të Kontrollit të Lartë të Shtetit pranë “Albcontrol” ku edhe ka konstatuar një sërë problematikash që lidhen drejtpërdrejt më procedurat e prokurimit.
Dhe me të drejt lind pyetja se ku lidhen këto dy publikime?
Ura lidhëse është Ministrja aktuale e Infrastrukturës dhe Energjisë, Belinda Balluku. Në një lajm ekskluziv të publikuar ditën e sotme në “Gazetën Reforma” kemi zbuluar se ministrja Balluku do ta zëvendësojë Etleva Kondin me ish-drejtorin e KVO (Komisionit të Vlerësimit të Ofertave) pranë Albcontrol, Ervis Berberin.
Mirëpo problemi që lind në këtë stad është se në një lajm tjetër të publikuar sërish në “Gazeta Reforma” me burim nga “Revista Monitor” , në Albcontrol janë vërejtur shkelje të rënda gjatë kohës që Berberi ka qenë drejtues i KVO, pranë Agjencisë së Prokurimit publik.
“Autoriteti Kontraktor dhe konkretisht në kontratat e shpallura së bashku me dokumentet standarde të tenderit (Shtojca 17, neni 9, pika 9.1), nuk parashikohej detyrimi i Autoritetit Kontraktor, për t`i shlyer operatorit fitues paradhënie për zbatimin e kontratës.
Ndërsa në kontratat, e nënshkruara midis palëve, në nenin 4 përcaktohet se: “Sipërmarrësi do të marrë një pagesë paraprake në masën prej 30% të vlerës totale të kontratës”, duke shkelur kështu barazinë midis operatorëve ekonomikë, në kundërshtim me Ligjin nr. 9643,datë 20.11.2006 “Për prokurimin publik”, i ndryshuar” nënvizon KLSH.
Kështu pra për të paktën 11 procedura prokurimi KLSH konstaton se kushtet janë ndryshuar në momentin e nënshkrimit të kontratës me operatorët përkatës ndërkohë që ato pasqyroheshin ndryshe në termat specifike para garës.
Mirëpo nuk dihet nëse ministrja është në dijeni të këtij auditimi dhe pavarësisht kësaj, ka vendosur që të zëvendësoj Kondin me Berberin.
Mesa duket në Ministrinë e Infrastrukturës dhe konkretisht në Drejtorinë e Partneriteteve Publik-Privat, ministrat kanë nevojë që të kenë pranë vetes njerëz që e dinë se i kanë të besuar. Njëjtë si Gjiknuri, edhe Balluku zgjodhi një person të cilin e njeh mirë.
Duhet marrë parasysh që Belinda Balluku ka qenë për një periudhë kohe drejtuese e Albcontrol, prej nga mund të ketë krijuar edhe mendimin dhe vlerësimin për ish- drejtuesin e Komisionit të Vlerësimit të Ofertave dhe tashmë drejtorin e Partneriteteve Publik-Privat, Ervis Berberin.
