Këshilli i Lartë Gjyqësor ka vendosur mbarimin e ushtrimit të detyrës së Ardian Dvoranit si gjyqtar në Gjykatën e Lartë, pas një kalvari të gjatë përplasjesh mes tij dhe presidentit Ilir Meta.
Anëtarët kanë vendosur me 6 vota pro për përfundimin e ushtrimit të detyrës së Ardian Dvoranit, ndërsa 4 prej tyre kanë qenë kundër, teksa anëtari Dritan Hallunaj mungonte.
Kështu, Ardian Dvorani pas vendimit të KLGJ për mbarimin e mandatit si gjyqtar në gjykatën e Lartë, largohet edhe nga drejtimi i KED.
Dvorani u zgjodh anëtar i Gjykatës së Lartë më 17 shkurt 2005 për një mandat 9-vjeçar.
Mandati i tij përfundoi më datë 17 shkurt 2014, por edhe pse kaluan më shumë se gjashtë vjet nga ajo kohë, Dvorani vijoi të ushtrojë detyrën, me justifikimin se ai ka të drejtë të qëndrojë deri sa të emërohet pasuesi i tij.
Në vitin 2016, 35 deputetë të Kuvendit i kërkuan Gjykatës Kushtetuese të shprehej mbi përfundimin e mandatit të Dvoranit.
Në qershor 2016, Gjykata Kushtetuese, me Vendimin Nr. 55, e shpalli antikushtetues atë pikë të ligjit që lejonte qëndrimin në detyrë pas mbarimit të mandatit të një anëtari të Gjykatës së Lartë derisa ai të zëvendësohej.
Por, vendimi i Gjykatës Kushtetuese hyri në fuqi më 12 gusht, kur ai u botua në Fletoren Zyrtare, dy ditë pas hyrjes në fuqi të ndryshimeve të Kushtetutës, të cilat e kishin hequr farë nenin e vazhdimit të mandatit deri në zevendësim, por që nga ana tjetër në dispozitat tranzitore lejonin qëndrimin në detyrë të anëtarëve ekzistues të Gjykatës së Lartë deri në zëvendësimin e tyre.
Edhe pse rasti i tij ishte i pastër—ndryshimet kushtetuese e gjetën Dvoranin në detyrë për shkak të justifikimit të tij me një interpretim ligjor që Gjykata Kushtetuese e hodhi poshtë—Dvorani ka vazhduar të qëndrojë në detyrë, duke vendosur kështu një rekord botëror, duke shërbyer mbi gjashtë vjet pas mbarimit të mandatit.
KLGJ u vu në lëvizje pas kërkesës së presidentit Ilir Meta, në konfliktin mes tyre për procedurën e dekretimit të anëtarëve të Gjykatës Kushtetuese, i cili vijon tashmë prej gati 9 muajsh.
Meta i kërkoi KLGJ që të shprehej ose të njoftonte përfundimin e mandatit të Dvoranit, teksa KLGJ shtyu mbledhjen për çështjen “Dvorani” me arsyetimin se do duhet të pritet edhe mendimi i partnerëve të huaj.
Por, dy misionet e Bashkimit Europian dhe të Shteteve të Bashkuara të Amerikës EURALIUS dhe OPDAT refuzuan të japin opinion lidhur me këtë çështje, duke thënë se nuk pranojnë të japin opinione për çështje individuale, pasi kjo në rastin konkret është përgjegjësi ekskluzive e Këshillit të Lartë Gjyqësor.
Mirëpo, më në fund KLGJ vendosi të shkarkojë Ardian Dvorani, i cili nuk lëshonte karrigen prej 6 vitesh nga mbarimi i mandatit.
“Gazetareforma.com” mëson se gjithë kjo vonesë në shkarkimin e tij ka qenë e mirëmenduar nga Dvorani, pasi lëvizja e radhës është “kapja” e Gjykatës së Apelit.
Siç duket, marrja e kohës i ka shërbyer Dvoranit të mbyllë të gjitha procedurat dhe të jetë gati tashmë për pozicionin e tij të ri.
Ndonëse para kamerave u shpreh se nuk ka shumë për të thënë dhe se pret arsyetimin e vendimit nga KLGJ, gjithë ngërçi institucional i krijuar nga ai, si mes Kryeministrisë dhe Presidencës, ashtu edhe në Gjykatën Kushtetuese, ka pikërisht këtë arsye.
