Largimi i intelektualëve nga vendi është kthyer tashmë në një fenomen, i cili po prek të gjitha fushat dhe këtë herë ka qenë radha e futbollit.
Klubi i Vllaznisë së Shkodrës ka bërë një deklaratë publike ku lajmëron se trajneri i skuadrës, Hasan Lika do të largohet drejt Shteteve të Bashkuara të Amerikës për të jetuar së bashku me familjen.
Klubi shkodran lajmëron se gjithçka është mbyllur me marrëveshje, mirëpo aktualisht Vllaznia është pa trajner dhe nuk dihet se cili do të jetë zëvendësuesi i denjë i Likës. Duhet thënë se tashmë ish-trajneri Lika ka sjellë rezultate shumë pozitive për skuadrën duke e rikthyer atë në Superiore.
“KF Vllaznia bën të ditur se që nga dita e sotme Hasan Lika nuk do të jetë më trajner i ekipit të parë. Me kërkesën e vetë trajnerit, kontrata dypalëshe është ndërprerë për arsye se z.Lika bashkë me familjen e tij pas pak ditësh do të udhëtojnë drejt Shteteve të Bashkuara të Amerikës për të jetuar atje tashmë. Në këtë mënyrë, KF Vllaznia duke parë ecurinë e mirë të skuadrës e cila ka hedhur një hap të rëndësishëm drejt arritjes së objektivit, vendosi që të mos e pengojë për të ardhmen e tij.
KF Vllaznia e falenderon Lika për kontributin e tij në krye të skuadrës gjatë kësaj periudhe duke marrë parasysh momentin e vështirë kur e mori drejtimin e saj, megjithatë falë punës së tij dhe të futbollistëve, ekipi tashmë është shumë pranë arritjes së objektivit, daljes në Superligë.
Brenda një periudhë shumë të shkurtër, KF Vllaznia do të bëjë publik edhe emrin e trajnerit të ri që do të angazhohet për drejtimin e skuadrës së parë deri në fund të sezonit”, thuhej në deklaratën e Vllaznisë.
Urojmë që trajnerit t’i shkojë sa më mirë dhe Vllaznia të vazhdojë të bëjë një punë të mirë, për ta mbajtur ekipin jo vetëm në Superiore, por njëkohësisht të sigurojë fitore të mëtejshme.
