Emisioni investigativ “Fiks Fare” denoncoi avokatin Arbër Qehajaj, i cili ka kërcënuar një qytetare dhe gazetarët e emisionit pas denoncimit të një mashtrimi.
Policia e Tiranës njofton sot se ndaj avokatit ka nisur procedimi në gjendje të lirë.
“Specialistët për Hetimin e Krimeve Ekonomike dhe Financiare referuan materialet në Prokurori, ku nisi procedimi në gjendje të lirë për shtetasin A. Q., 43 vjeç, sepse ka kanosur gazetarët e emisionit investigativ ”Fiks Fare”, pas transmetimit në këtë emision, më datë 27.01.2025, të një videoje ku shfaqet shtetasi A. Q. duke mashtruar një shtetas tjetër, në lidhje me një akt padi për ta dërguar në gjykatë për zgjidhjen e martesës“-thuhet në njoftimin e policisë.
Qytetarja kishte paguar avokatin për një kërkesë padie-divorci që kurrë nuk u dorëzua në gjykatë, ndërkohë që avokati kishte firmosur për klientin pa autorizimin e tij.
Pas transmetimit të denoncimit, avokati kërcënoi gazetaren, duke e quajtur “gjobëvënëse” dhe duke e intimiduar me fjalë kërcënuese.
Për kërcënimet, policia e Tiranës ka nisur procedimin në gjendje të lirë ndaj avokatit, i cili pretendon se veprimet e tij ishin bërë në gjaknxehtësi dhe mohoi kërkesat financiare.
