Situata e rënduar e naftëtarëve të Ballshit vazhdon pa zgjidhje. Për këtë çështje, kryeministri Edi Rama u pyet dhe sot në konferencë për shtyp, teksa fliste për fermerët.
Rama u shpreh se marrëdhënia që naftëtarët kanë me kompaninë është kapitaliste, duke lënë të kuptohet se pagat e vonuara duhet t’i japë kompania private që ka shumicën e aksioneve, dhe jo shteti.
Kryeministri deklaroi se po bën çfarë ka mundësi, jashtë mundësi që ka për t’i dhënë ai zgjidhje problemit, duke ia faturuar kompanisë privat. Ai foli gjithashtu për një grevë të kotë të naftëtarëve, sepse sipas tij ai është i sensibilizuar, ndërsa u shpreh se do flasë edhe për ata që sipas tij, po i nxisin naftëtarët të qëndrojnë në grevë.
“Kjo është një marrëdhënie kapitaliste, jo marrëdhënie me shtetin. Ne po bëjmë çfarë kemi mundësi, ende nuk kemi gjetur zgjidhje. Nuk kemi mundësi të zgjidhim atë problem nga një kompani private, e përsëris, privat. Çfarë kemi bërë, ka qenë përpjekje ekstra për të ndihmuar ata njerëz. Nëse nuk do i ndihmonim siç i kemi ndihmuar, do kishin 7 vite në këtë situatë. Unë i kuptoj, dhe nuk ka nevojë t’i them me fjalë çfarë ndjej për ta. Jam i shqetësuar, por format e tilla të protestës nuk janë të nevojshme me mua. Nuk kam nevojë t’i shoh në grevë për të luftuar për ta. Është një mundim i panevojshëm për të më sensibilizuar mua. Unë jam plotësisht i sensibilizuar. Me ndihmën e Zotit ndoshta e zgjidhim. Do jap përgjigje edhe për ata që i nxisin të rrinë në atë grevë” – deklaroi Rama.
Edi Rama dhe qeveria e tij vijojnë të justifikohen me faktin se kompania është private, por vijon të qëndrojë në hije pa bërë lëvizje konkrete, duke i lënë naftëtarët të merren vetë me kompaninë, duke mos ndërhyrë të rishikojë kontratat.
/GazetaReforma.com/
