Një krim i rëndë ka tronditur Italinë dhe komunitetin e Afragolës, pranë Napolit. Martina Carbonaro, 14 vjeçe, e zhdukur prej dy ditësh, është gjetur e pajetë pranë një ndërtese të rrënuar afër ish-stadiumit ‘Moccia’, vetëm pak metra larg banesës së saj.
Trupi i saj ishte i mbështjellë në një qese plastike dhe i lidhur, një detaj që ka shokuar opinionin publik.
Nëna e Martinës, Fiorenza Cossentino, ka folur mes lotëve për mediat italiane, duke përshkruar me dhimbje momentet e fundit dhe dyshimet që kishte për të dashurin e vajzës së saj. “Vajza ime u hodh si mbeturina në një qese. Trupi i saj ishte i lidhur. Kush do ma kthejë vajzën tani?”, tha ajo, duke shtuar se kishte pyetur të dashurin e vajzës nëse i kishte bërë diçka. “Ai e mohoi, më tha ‘Nuk e preka fare’. Por e kuptova kur ai erdhi në shtëpinë time dhe tha se kishte bërë dush”, tregoi ajo.
Nëna rrëfen gjithashtu se vajza e saj ishte e dashuruar, por edhe e frikësuar. “Kur ai e qëlloi me shuplakë disa kohë më parë, ajo e kuptoi që ai mund të ishte i dhunshëm”, u shpreh ajo, duke nënvizuar një episod që mund të kishte qenë paralajmërues për atë që do të ndodhte.
Policia italiane ka arrestuar ish-të dashurin e saj, Alessio Tucci, 18 vjeç, i cili tashmë përballet me akuza të rënda për vrasje dhe fshehje të kufomës. Gjatë marrjes në pyetje nga prokuroria e Napolit të Veriut, ai ka pranuar krimin, duke pohuar se e kishte vrarë vajzën dhe më pas kishte fshehur trupin e saj.
Sipas hetimeve të deritanishme, vrasja rezulton të ketë qenë e dhunshme, pasi Martina është goditur disa herë në kokë me një gur. Dyshohet se shkaku i krimit ka qenë sentimental: vajza kishte vendosur të ndërpriste lidhjen, një fakt që 18-vjeçari nuk mund ta pranonte.
Ngjarja ka tronditur thellë komunitetin e Afragolës, ndërsa autoritetet lokale kanë nisur hetimet e plota për zbardhjen e plotë të këtij krimi tragjik.
