Ndërsa ka vazhduar adhurimin e tij ndaj kryeministrit Edi Rama, Erion Veliaj nuk ka kursyer as mashtrimet e tij. Duke vazhduar fushatën elektorale në Kavajë, Veliaj ka thënë se vrasja e Klodian Rashës ishte aksidentale. Literalisht Veliaj ka thënë: “…Klodian Rashës që humbi jetën aksidentalisht…gjatë atij konfrontimi”. Me këtë Veliaj u mundua të tregonte se Rama është njeri që e njeh dhimbjen dhe mund të ngrejë në këmbë një komb të tërë.
“Edi Rama është njeri që i dhimbset një njeri i sëmurë. Ishim tek shtëpia e Arjan Salës, Klodian Rashës që humbi jetën aksidentalisht…gjatë atij konfrontimi. Rama është njeri që e njeh dhimbjen se e ka përjetuar në familjen e vetë. Kur dikush flet që ka humbur nënën dhe babain prej kësaj sëmundjeje e di, sepse ka humbur nënën dhe babain e tij. Është njeri që e kupton dhimbjen, por nuk e lë dhimbjen ta gjunjëzojë. Duke e njohur Edin sesi ka përballur, e si është ngritur në këmbë nga dhimbjet personale, kanë parë një njeri që mund të ngrejë në këmbë një komb të tërë. Nuk i ka shkaktuar dhimbje askujt”, ka thënë Veliaj.
Minuta 22.55 ne video:
https://www.facebook.com/ErionVeliaj/videos/498505744500981/
Veç gënjeshtrave të përditshme, Veliaj ka filluar tashmë edhe të shtrembërojë faktet dhe të vërtetën e dukshme. Klodian Rasha u vra natën e 8 dhjetorit nga efektivi i forcave Shqiponja, Nevaldo Hajdaraj dhe kjo nuk është diçka që nuk e di kush. Ashtu si u tentua të mbulohej vrasja e Klodianit, duke thënë se ai kishte probleme mendore, apo duke çuar një pistoletë që nuk i përkiste atij në vendin e krimit, edhe Veliaj po mundohet tashmë të tjetërsojë ngjarjen.
E vërteta është se dhuna policore që arriti kulmin me vrasjen e rashës, 25 vjeç, vjen si pasojë e përdorimit të Policisë si një aparat i ushtrimit legjitim të dhunës nga shteti. Dështimi i qeverisë duke bërë pjesë të policisë njerëz të pakualifikuar, ka bërë që degradimi i saj të arrijë në këtë pikë ku kthimi pas bëhet i vështirë. Dhe Veliaj e di mirë këtë, pasi është e njëjta gjë që ai ka bërë me Policinë Bashkiake duke e kthyer në një aparat terrori që përzë me dhunë shitësit ambulantë, heq zvarrë qytetarët në protestat para bashkisë etj. Sado të përpiqet Veliaj që t’i mbulojë këto dështime e të hedh baltë mbi të vërtetën, të gjithë e dimë se Klodian Rasha u vra, vdekja e tij nuk ishte aspak aksidentale.
