Është ndarë nga jeta në moshën 39-vjeçare prokurorja Erida Kokonozi, e cila e ushtronte detyrën në Prokurorinë pranë Shkallës së Parë Elbasan. Mësohet se Kokonozi vuante nga një sëmundje e rëndë dhe nuk ka mundur ta fitojë betejën me të.
Këshilli i Lartë i Prokurorisë ka reaguar për lajmin e hidhur, duke i shprehur ngushëllimet familjes, teksa deklaron se zonja Kokonozi ka qenë një nga magjistratët e spikatur të sistemit të prokurorisë dhe do kujtohet përherë me nderim.
REAGIMI I PLOTE I KLP
Këshilli i Lartë i Prokurorisë shpreh ngushëllimet e sinqerta për ndarjen e parakohshme nga jeta, në moshën 39 vjeçare, pas një sëmundje të gjatë, të prokurores Erida Kokonozi, e cila e ushtronte detyrën në Prokurorinë pranë Shkallës së Parë Elbasan.
Zonja Kokonozi ka qenë një nga magjistratët e spikatur të sistemit të prokurorisë, e cila e ka nderuar figurën e prokurorit, duke treguar një shkallë të larte integriteti dhe profesionalizmi në ushtrimin e detyrës.
Komuniteti i prokurorëve do ta kujtojë znj. Kokonozi përherë me nderim, për kontributin e saj të çmuar në fushën e drejtësisë. U shprehim ngushëllimet tona familjareve dhe të afërmve, për ndarjen e saj nga jeta.
Emri i saj është lakuar edhe në Nëntor të vitit 2017, kur Prokuroria e Elbasanit kishte nisur hetime për pastrim parash ndaj familjeve të personave që rezultonin pronarë biznesesh të ndryshme me miliona euro xhiro e fitime.
Konkretisht, Prokuroria e Elbasanit me 27 Tetor 2017, i kishte kërkuar Degës së Tatim Taksave, Bankave të Nivelit të Dytë, Drejtorisë së Shërbimit të Transporteve, Degës së Doganave hetim të veprimeve për 67 persona të botës së biznesit, qeverisë vendore dhe Universitetit.
