Udhëheqësja e ekstremit të djathtë në Francë, Marine Le Pen, është përjashtuar nga gara për zgjedhjet presidenciale të vitit 2027 pasi një gjykatë e shpalli fajtore për përvetësim të fondeve nga Parlamenti Evropian.
Vendimi i ndalon asaj të mbajë poste publike për pesë vjet, me efekt të menjëhershëm, duke goditur rëndë ambiciet e saj politike.
Le Pen, e cila shpresonte të kandidonte për herë të katërt për postin e presidentes, e ka cilësuar vendimin si një “dënim politik me vdekje” për lëvizjen e saj dhe ka paralajmëruar apelimin e tij.
Gjykata e dënoi gjithashtu me katër vite burg, dy prej të cilave të pezulluara, si dhe me një gjobë prej 100,000 paundësh.
Bashkë me të, 24 anëtarë të partisë së saj, përfshirë ish-deputetë të Parlamentit Evropian dhe ndihmës parlamentarë, u shpallën fajtorë për një skemë përvetësimi që zgjati nga viti 2004 deri në 2016.
Ata akuzohen për përdorimin e fondeve të BE-së, të destinuara për asistentët parlamentarë, për të paguar punonjës të partisë në Francë. Dëmi i shkaktuar ndaj buxhetit evropian llogaritet në 4.5 milionë euro.
Pavarësisht këtij vendimi, Le Pen do të mbajë mandatin e saj si deputete në Asamblenë Kombëtare për Pas-de-Calais, por nuk do të mund të kandidojë në zgjedhjet e ardhshme parlamentare.
Partia e saj, Tubimi Kombëtar, e cila doli forcë kryesore në zgjedhjet parlamentare të vitit 2024, tani përballet me sfidën e gjetjes së një kandidati të ri për zgjedhjet presidenciale të 2027-s.
Një nga emrat më të mundshëm për ta zëvendësuar është Jordan Bardella, 29 vjeç, aktualisht president i partisë dhe deputet në Parlamentin Evropian.
Megjithëse i popullarizuar te votuesit, ai shihet si një figurë me përvojë të kufizuar në politikën franceze.
