Pasditen e sotme një ngjarje e rëndë ka ndodhur në rrugën “Islam Alla” në Tiranë. Raportohet se një burrë ka qëlluar për vdekje me armë zjarri të vëllain dhe kunatën e tij.
Policia ka identifikuar autorin dhe është vënë në ndjekje të tij. Mësohet se ngjarja ka ndodhur brenda ambienteve të një agjencie turistike, ndërsa pritet të zbardhen rrethanat e plota.
Në hyrje dhe dalje të kryeqytetit janë ngritur postblloqe për kapjen e autorit të krimit të rëndë.
Gjithashtu Policia e Tiranës ka dalë me njoftim zyrtar në lidhje me këtë vrasje të dyfishtë të ndodhur këtë mesditë në Tiranë. Në njoftim, policia bën me dije se Arsen Muskurti ka qëlluar me armë zjarri në drejtim të të vëllait, Dritan Muskurti e bashkëshortes së këtij të fundit që ende nuk është identifikuar. Për pasojë çifti kanë mbetur të vdekur në vend. Krimi dyshohet të ketë zanafillë një sherr për një pronë të përbashkët të dy vëllezërve.
Njoftimi: Më datë 30.08.2022, në rrugën “Islam Alla”, dyshohet se si pasojë e një konflikti familjar, shtetasi A. M., dyshohet se ka qëlluar me armë zjarri drejt vëllait të tij shtetasit D. M., 44 vjeç, dhe një shtetaseje tjetër, ende të paidentifikuar, (dyshohet bashkëshortja e shtetasit D. M.) të cilët si pasojë kanë ndërruar jetë. Shërbimet e Policisë kanë shkuar menjëherë në vendngjarje dhe po vijojnë kontrollin e zonës me qëllim kapjen e autorit. Grupi hetimor nën drejtimim e Prokurorisë po punon për sqarimin e plotë të rrethanave të ngjarjes.
