Mbrëmjen e djeshme në emisionin “Top Story”, u diskutua mbi dënimin e Fredi Belerit nga Gjykata e Posaçme e Apelit, ndërsa Ervin Karamuço tha se kryebashkiaku i zgjedhur i Himarës ka pasur një sjellje të mirë në ambientet e paraburgimit në Fier. Madje Karamuço tha se Beleri i ka shpëtuar jetën një ish-kryebashkiaku që tentoi të vriste veten për shkak të gjendjes së rëndë psikologjike.
Grida Duma: Karamuço sot Beleri ndodhet në burg të sigurisë së lartë, sigurisë normale, ku është situata e tij sot dhe si do e vazhdojë dënimin e tij, si llogaritet dënimi?
Ervin Karamuço: Është në paraburgim, në mos gaboj në Fier. Madje ka raporte nga shërbimet penitenciare jo vetëm për sjelljen e tij të mirë, por i ka shpëtuar jetën një tjetër ish-përfaqësuesi vendor, i cili edhe ai vuan në paraburgim. Për shkak të gjendjes së rënduar psikologjike, ka dashur të vrasë veten dhe e ka shpëtuar Beleri. Një tjetër personazh i cili ka tentuar disa herë të vrasë veten brenda paraburgimit aktualisht.
Burime për Voxnews thanë se eksperti i kriminalistikës, Ervin Karamuço e ka patur fjalën se kryebashkiaku i cili ka tentuar të vrasë veten është, Safet Gjici. Ky i fundit ndodhet prej një viti në burg, pas publikimit të videoskandalit seksual, që ndodhi në zyrën e tij. Së fundi ai është dërguar në ambientet e një spitali privat në kryeqytet, për shkak se ka shfaqur komplikacione me shëndetin, dhe humbje drastike të peshës.
