Një ngjarje e rëndë ka ndodhur Berat ku një 16-vjeçare i ka dhënë fund jetës për shkak se i bënin shantazh me një video.
Është zbuluar se djali 17-vjeçar e kërcënonte me publikimin e një videoje dhe prej javësh i dërgonte minorenes mesazhe në telefonin e saj dhe për këtë arsye 16-vjeçarja ka vendosur t’i jap fund jetës duke u vetëhelmuar me fotoksinë.
Sipas “Ballkanvveb”, vajza e cila është identifikuar si A.Ç, është vetëhelmuar dy ditë më parë, ndërsa ditën e sotme është përcjellë për në banesën e fundit.
A.Ç është çuar në banesën e saj të fundit në varrezat e fshatit Duhanas. Tronditja e familjarëve ka qenë e madhe dhe kjo sepse askush nuk e kishte vënë re gjëndjen e rënduar të vajzës.
Të dy si A.Ç ashtu edhe kërcënuesi i saj, D.K kanë qenë në të njëjtin gjimnaz dhe tashmë këtij të fundit i janë vënë prangat.
Burimet zyrtare të Drejtorisë së Policisë së Qarkut Berat, nëpërmjet një komunikatë për shtyp ,njoftuan edhe arrestimin e 17-vjeçarit D.K, banues në lagjen “Kushtrim” në Berat që, sipas policisë, e kishte përndjekur prej disa ditësh vajzën me mesazhe telefonike kërcënuese. 17-vjeçari do të përballet tashmë me akuzën e “Përndjekjes” në Gjykatën e të miturve.
Për rastin ka reaguar edhe drejtori i shkollës në të cilën shkonin të miturit, i cili thotë se 16-vjeçarja ka qenë një nxënëse e dalluar, e urtë dhe asnjëherë nuk ka qenë problematike. Sipas drejtorit, mësesit dhe psikologët nuk kishin vënë re asgjë dhe nuk ishin në dijeni të situatës. Ai thotë se dy minorenët nuk ishin në të njëjtën klasë, por mund të jenë njohur gjatë aktiviteteve jashtëshkollore.
