Një ngjarje e rëndë ka ndodhur këtë të martë në lagjen Višnjička Banja të Beogradit, ku një person i paidentifikuar qëlloi me armë zjarri drejt një lokali, duke lënë të plagosur pesë persona. Sipas Ministrisë së Punëve të Brendshme, mes të lënduarve janë tre burra dhe dy gra.
Ngjarja u regjistrua rreth orës 14:23, ndërsa të plagosurit u transportuan menjëherë në Qendrën e Emergjencës. Fillimisht u raportua se njëra prej grave nuk kishte shenja jete, por burime mjekësore konfirmuan se ajo është ende gjallë, ndodhet në gjendje kritike dhe i është nënshtruar reanimacionit.
Në vendngjarje u vendos aksioni policor i koduar “Vorbulla 3”, me qëllim sigurimin e zonës dhe kontrollin e lëvizjeve. Hetuesit kanë mbledhur prova nga lokali, ndërsa identiteti i autorit mbetet i panjohur.
Policia serbe vijon punën për zbardhjen e plotë të rrethanave dhe për kapjen e autorit të sulmit, ndërsa u ka bërë thirrje qytetarëve të qëndrojnë larg zonës dhe të bashkëpunojnë me autoritetet nëse disponojnë informacione të dobishme.
