Një qendër polivalente të moshuarish rrezikon që të kthehet në një vatër të madhe infeksioni me koronavirus në qytetin e Poliçanit në Skrapar, duke bërë që shumë prej të moshuarve aty t’u rrezikohet seriozisht jeta.
Drejtori dhe dy punonjëse të qendrën polivaliente të të moshuarve, kanë rezultuar sot pozitivë me SarsCov-2.
Covid-19 ka hyrë tashmë edhe në qytetin e Poliçanit, ku që prej muajit korrik nuk ka pasur asnjë të infektuar.
Kjo ka vënë në alarm gjithë stafin e kësaj qendre dhe të moshuarit, të cilët janë karantinuar dhe do t’i nënshtrohen tamponit.
Mësohet se të infektuarit janë pjesëtarë të së njëjtës familje dhe gjendja e tyre shëndetësore është e mirë. Edhe 5 raste të tjera në qytetin e Poliçanit nga mosha 52-84 vjeç, janë konfirmuar “pozitivë” nëpërmjet skanerit të kryer pas shfaqjes së shenjave të theksuara të infektimit.
Ata janë transportuar në Repartin e Karantinës në Spitalin Rajonal të Beratit, ku përveç mjekimeve po marrim edhe trajtim me oksigjen.
Burimet zyrtare pranë DSHP-së Berat, bëjnë me dije se, për të gjitha rastet e evidentuara “pozitive” po kryhet hetimi epidemiologjik i rasteve të kontaktit.
Në qendrën e të moshuarve, ku edhe u shfaqën infektimet e para, është kryer dezinfektimi i të gjitha ambienteve të brendshme e të jashtme. Aktualisht në të gjithë qarkun e Beratit numërohen 214 raste aktive me Covid-19.
/GazetaReforma.com/
