Në lidhje me vrasjen e 57-vjeçarit Pjetër Kaza, ngjarje e ndodhur një ditë më parë në fshatin Tale të Lezhës, policia ka shoqëruar disa persona për t’i marrë në pyetje, mes tyre edhe të afërm të fisit Gjini, me të cilët familja e viktimës ndodhet në hasmëri prej vitesh.
Pavarësisht shoqërimeve, dëshmitë e dhëna nuk kanë sjellë ndonjë zhvillim konkret në hetim dhe personat janë liruar më pas.
Ndërkohë, grupi hetimor ka sekuestruar pamjet e kamerave të sigurisë në zonë dhe po analizon të dhënat për të identifikuar autorin e dyshuar.
Sipas burimeve nga hetimi, mendohet se atentatori është larguar në këmbë pas krimit dhe kishte qëndruar për më shumë se një orë pranë banesës, në pritje që Kaza të kthehej nga puna.
Vrasja ndodhi në oborrin e shtëpisë, sapo 57-vjeçari kishte mbërritur me makinën e tij pas një dite pune në minierën e Spaçit.
Pista kryesore që po hetohet është ajo e gjakmarrjes, por policia nuk përjashton as motive të tjera të mundshme që lidhen me konflikte të mëparshme.
Hetimet vijojnë me intensitet për zbardhjen e plotë të rrethanave dhe identifikimin e autorit.
