Mbrojtësi Thiago Silva, kapiten i ekipit brazilian, i cili do të përballet me Argjentinën në Maracana për titullin e Copa América të phtunën, pranoi se mbulimi i Lionel Messit është pothuajse i pamundur, por që Brazili u përgatit ta zvogëlojë atë në minimum në sulmet e tij.
“Ne kemi mënyrën tonë të të luajturit dhe kundër Argjentinës do të mbajmë lojën tonë sepse besojmë në të, megjithëse vështirësia do të jetë e ndryshme sepse ata kanë Messin, një lojtar që zhbalancon“, tha mbrojtësi i Chelsea në një konferencë për shtyp.
“Ne nuk do ta markojmë atë sepse është pothuajse e pamundur të markohet një lojtar i atij niveli, por ne do të minimizojmë veprimet e tij sulmuese në mënyrë që ai të mos ketë hapësira dhe ne do të neutralizojmë aksionet”, shtoi kapiteni brazilian.
Thiago Silva tha se ishte i sigurt se Argjentina varet nga ajo që bën Messi sepse ai është një lojtar që bën diferencën, megjithëse ai pranoi se ka edhe futbollistë të tjerë, ata që ia kalojnë topin, me të cilët Brazili gjithashtu duhet të jetë i kujdesshëm.
“Ne duhet t’i kushtojmë vëmendje atyre lojtarëve dhe të dyfishojmë vëmendjen tonë tek Messi sepse ai është një lojtar që zhbalancon, ndërsa Neymar zhbalancon për Brazilin. Do të jetë një duel i shkëlqyeshëm, por shpresoj që Neymar të jetë në një ditë më të frymëzuar“, tha mbrojtësi veteran.
