Prej më se dy javësh Komiteti Teknik i Ekspertëve lajmëroi se do të mblidhej për një rishikim të masave kufizuese për parandalimin e përhapjes së pandemisë COVID-19. Por der’ tani “Asgjë e re nga fronti i Perëndimit”. Në fuqi kanë mbetur masat kufizuese të ndalimit të lëvizjes nga ora 20:00 deri në orën 06:00, kombinimi i mësimit online me atë në auditore dhe ndalimi i udhëtimeve me Britaninë. Por këto masa nuk po ndryshojnë edhe pse numri i vdekjeve ditore nga COVID mbetet çdo ditë i lartë. Një thirrje për ndryshim masash e ka bërë edhe mjeku Pëllumb Pipero, i ftuar në emisionin e mëngjesit në ABC Neës. Ai ka thënë se gjatë fundjavave duhet të ndalohet udhëtimi jashtë Tiranës dhe të kufizohen lëvizjet. Gjithashtu ai tha se duhen respektuar masat që janë në fuqi.
“Për mua duhet të ndalohet udhëtimi jashtë Tirane. Në fundjavës duhet të ketë një ndalim të kalimit nga një rajon tek tjetri, pasi mbipopullimi i lokaleve sjell transmetim të Covid-19. Po ashtu duhet të respektohen masat aktuale.Unë mendoj që lokalet të zbatojnë masa strikte dhe po të respektohen masat aktuale dhe të kufizohen lëvizjet në fundjave, mund të frenohet edhe përhapja e virusit. Për mua si mjek, indikator kryesor nuk është numri i rasteve të infeksioneve, por numri i rasteve që shtrohen në spital.Numri i atyre që shtrohen në spital është real, i rasteve të rënda, i atyre që humbasin jetën këto janë indikatorë që mua si mjek më shqetësojnë”, tha Pipero.
