Një ngjarje e pazakontë ka ndodhur pasditen e së hënës në Portin Detar të Durrësit, ku një jaht është zhdukur përkohësisht nga vendi ku ishte i ankoruar prej muajsh.
Pronari i mjetit lundrues, Dorian Alikaj, ka bërë një kallëzim në Komisariatin e Policisë Durrës, pasi nuk ka gjetur më jahtin e tij të quajtur “Tamomar 2” në zonën e ankorimit. Sipas tij, rreth orës 14:00 është njoftuar për mungesën e mjetit dhe menjëherë ka informuar Policinë Kufitare, për të vijuar më pas me denoncimin pranë komisariatit të qytetit.
Menjëherë pas njoftimit, strukturat policore kanë nisur hetimet. Në mënyrë të papritur, jahti është konstatuar teksa po rikthehej në të njëjtin vend, në ish-kalatën e peshkimit. Personat që ndodheshin në bord janë shoqëruar menjëherë në komisariat për të dhënë shpjegime mbi rrethanat e ngjarjes.
Ende nuk dihet se si është arritur të vihet në punë mjeti lundrues, pasi çelësat ndodheshin në ruajtje pranë kapitenit të jahtit, Memet Ayhan Ulus. Burime nga policia bëjnë me dije se tre persona janë duke u marrë në pyetje për të zbardhur plotësisht këtë incident.
