Presidenti i zgjedhur i Shteteve të Bashkuara Donald Trump tha të premten se Partia Republikane “do të bëjë përpjekjet e saj më të mira” për t’i dhënë fund praktikës së ndryshimit të orës, të cilën ai e quajti “të papërshtatshme dhe shumë të kushtueshme për vendin”.
Praktika që synon një shfrytëzim më të mirë të orëve me dritë dhe kursimin e energjisë – duke lëvizur akrepat një orë përpara gjatë muajve të verës për të përfituar më shumë nga mbrëmjet – ka qenë në fuqi në shumicën e Shteteve të Bashkuara që nga vitet 1960. Megjithatë, kjo çështje ka qenë objekt debati gjatë viteve të fundit.
Disa ligjvënës kërkojnë që të ruhet ora lokale gjatë gjithë vitit, pa ndryshime. Të tjerë propozojnë që ndryshimi i orës të zbatohet përgjatë gjithë vitit, ndërsa një pjesë preferojnë të ruhet status quo-ja aktuale.
Presidenti Joe Biden nuk ka shprehur ende një qëndrim publik mbi këtë temë.
Në mars të vitit 2022, Senati amerikan votoi unanimisht për ta bërë të përhershëm ndryshimin e orës, por përpjekja u ndal në Dhomën e Përfaqësuesve për shkak të mungesës së konsensusit mbi këtë çështje.
Në fillim të marsit, një grup senatorësh nga të dyja partitë bëri një tjetër përpjekje për ta çuar përpara këtë nismë.
Mbështetësit e ndryshimit të përhershëm argumentojnë se pasditet me më shumë dritë gjatë dimrit mund të nxisin aktivitetin ekonomik.
Nga ana tjetër, kritikët paralajmërojnë se kjo mund të shkaktojë probleme për fëmijët, të cilët do të duhej të shkonin në shkollë në errësirë për shkak të vonesës në lindjen e diellit.
Përkrahësit e eliminimit të plotë të ndryshimit të orës theksojnë se lëvizja e akrepave dy herë në vit shkakton probleme me gjumin dhe ndikon negativisht në shëndet.
Ndërkohë, Kongresi nuk ka mbajtur asnjë seancë dëgjimore mbi këtë temë për më shumë se dy vite, dhe çështja duhet të rishqyrtohet nga Senati.
Ndryshimi i orës ka një histori të gjatë në Shtetet e Bashkuara.
Gjatë Luftës së Dytë Botërore, ai u përdor për të kursyer energji dhe u rikthye në vitin 1973 për të ulur konsumin e energjisë gjatë një embargoje nafte. Megjithatë, masa nuk pati mbështetje popullore dhe u shfuqizua pas një viti.
Që nga viti 2015, rreth 30 shtete amerikane kanë propozuar ose miratuar ligje për të ndaluar ndryshimin e orës dy herë në vit.
Disa prej tyre kanë theksuar se kjo do të ndodhë vetëm nëse edhe shtetet fqinje marrin të njëjtin vendim.
